• twitter
  • facebook
  • livejournal
  • vkontakte
  • youtube
  • instagram
  • soundcloud

ЦIыфхэм яфитыныгъэхэр къаухъумэх

Монополием пэшIуекIогъэнымкIэ федеральнэ къулыкъум АР-мкIэ и ГъэIорышIапIэ 2016-рэ илъэсым Iофэу ышIагъэр зыщызэфихьысыжьыгъэ пресс-конференцие бэмышIэу къытыгъ ащ ипащэу Кубэщыч Аслъан.

Пащэм къызэриIуагъэмкIэ, хэбзэ­гъэуцугъэм къыдилъытэрэ лъэныкъо пстэури гъэцэкIэгъэныр, рекламэм, къэралыгъо ыкIи муниципальнэ фэIо-фашIэхэм язаказхэр, нэмыкIхэри зэ­шIохыгъэнхэм лъыплъэгъэныр 2016-рэ илъэсым монополием пэшIуекIо­гъэнымкIэ федеральнэ къулыкъум АР-мкIэ и ГъэIорышIапIэ ипшъэрылъ шъхьэIагъ. Джащ фэдэу монополием пэшIуекIогъэнымкIэ федеральнэ къулыкъум естественнэ монополиехэм Iоф зэрашIэрэм гъунэ лъефы. А IофшIэныр зыфытегъэпсыхьагъэр ахэм къыдагъэкIырэ товархэр, агъэ­цэкIэрэ фэIо-фашIэхэр къызIэкIагъэ­хьанхэмкIэ зэкIэми зэфэдэ амал яIэныр ары.

Адыгэ Республикэм ичIыпIэхэм зэнэкъокъумкIэ фитыныгъэхэр агъэцэ­кIэнымкIэ ГъэIорышIапIэм анахьэу ынаIэ зытыригъэтыгъэр унэе предпринимательхэм, хъызмэт субъектхэм ядэо тхылъхэм ахэплъэгъэныр ыкIи зэхэфыгъэнхэр ары. Джащ фэдэу республикэм экономикэ хэхъоныгъэхэр ышIын­хэмкIэ зиягъэ къэкIорэ ыкIи зэн­экъокъу шIыкIэр тэрэзэу зымыгъэфедэрэ пстэуми пшъэдэкIыжь ягъэхьыгъэным, гъэцэкIэкIо хэбзэ къулыкъухэм ыкIи чIыпIэ зыгъэ­IорышIэжьыпIэхэм япшъэрылъхэр шIуа­гъэ къытэу агъэцэкIэнхэм мэхьанэшхо ра­тыгъ. Мы лъэныкъомкIэ мэхьанэшхо зиIэ Iофыгъоу 2016-рэ илъэсым зыхэплъагъэхэм А. Кубэщычым ягугъу къышIыгъ.

2016-рэ илъэсым дэо тхылъ ыкIи заявление 300-м кIахьэу къулыкъум зэхифыгъ. Хэукъоныгъэ зышIыгъэхэм административнэ пшъэдэкIыжь ягъэ­хьыгъэнымкIэ унэшъуи 184-рэ ышIыгъ. 2016-рэ илъэсым къызэрагъэгъэзэ­жьын фэе тазырэу атыралъхьагъэр сомэ миллиони 2-рэ мин 815-рэ мэхъу.

Мы къулыкъум иIофшIэнкIэ уасэ­хэмкIэ федеральнэ къулыкъум зэпхыныгъэ пытэ дыриI. ГъэIорышIапIэм хъызмэтхэр зезыхьэхэрэм, унэе предприятие инхэм, гъэцэкIэкIо хэбзэ ыкIи чIыпIэ зыгъэIорышIэжьынымкIэ къулы­къухэм ядэо тхылъхэм язэхэфын лъэшэу ынаIэ атырегъэты.

Зэфэхьысыжьхэм къызэрагъэлъэгъуа­гъэмкIэ, хэбзэгъэуцугъэу «Нэкъокъоныр къэухъумэгъэным ехьылIагъ» зы­фиIорэм къыдыхэлъытэгъэ лъэныкъохэр 2016-рэ илъэсым гъогогъуи 6-рэ аукъуагъэу ГъэIорышIапIэм къыхигъэ­щыгъ. Ахэр дэгъэзыжьыгъэнхэмкIэ унэшъо гъэнэфагъэхэр ашIыгъэх. Хэукъоныгъэ анахь инэу къыхагъэщыхэрэм ащыщых цIыфхэм ыкIи бизнесым пылъхэм электрическэ сетьхэм запагъэнэнымкIэ хэбзэгъэуцугъэр зэраукъорэр.

ГущыIэм пае, электрическэ сетимкIэ зэзэгъыныгъэу адишIыгъэр укъуагъэ зэрэхъугъэм къыхэкIэу зэIухыгъэ Iахь­зэхэлъ обществэу «Кубаньэнерго» зыфиIорэр ыгъэмысэу унэе предпринимателым дэо тхылъкIэ монополием пэшIуекIорэ ГъэIорышIапIэу АР-м щыIэм зыфигъэзагъ. ГъэIорышIапIэм икомиссие Iофым зыхаплъэм «Кубаньэнергом» хэукъоныгъэхэр ышIы­гъэхэу къыхигъэщыгъэх ыкIи ахэр дэгъэзы­жьыгъэнымкIэ унашъоу афи­шIыгъэр игъом гъэцэкIагъэ хъугъэ.

Рекламэм фэгъэхьыгъэ хэбзэгъэуцугъэр зэраукъуагъэм къыхэкIыкIэ административнэ Iофи 7 къызэIуахыгъ. Ащ щыщэу 5-р хэукъоныгъэ мыинэу зэрэщытыгъэм къыхэкIыкIэ зэфа­шIыжьыгъ, Iоф 11-кIэ административнэ пшъэдэкIыжь арагъэхьыгъ.

Кубэщыч Аслъан журналистхэм яупчIэхэм джэуапхэр къаритыжьызэ къызэрэхигъэщыгъэмкIэ, зипэщэ къулыкъум иIофышIэхэм блэкIыгъэ илъэсым ыкIи къихьагъэм анахьэу анаIэ зытырагъэтырэр цIыфым нахь ищыкIэгъэ гъомылапхъэхэм ауасэ къыдэмыкIоеныр, мы лъэныкъомкIэ хэбзэгъэуцугъэр зыукъохэрэм пшъэ­дэкIыжь ягъэхьыгъэныр ары.

— Продукциер къыдэзыгъэкIы­хэрэми, ахэр зыщэфыхэрэми яшIо­игъоныгъэхэр зэтемыфэхэу, шъхьадж ипшъэрылъ ымыгъэцакIэу Iофхэм язытет нахьышIу хъущтэп, сыда пIомэ зэкIэми тызэпхыгъ. Тэ талъэныкъокIэ къыттефэрэр зэкIэ дгъэцэкIэщт, цIыф­хэм яфитыныгъэхэр къызэрэтыухъу­мэщтым тыпылъыщт, — къыIуагъ кIэухым Кубэщыч Аслъан.

КIАРЭ Фатим.